Докторов Алексей Афанасьевич (1914-1990), сэриигэ ҮөҺээ Бүлүүттэн ыңырыллыбыта. Төннөн кэлэн кэргэннэнэн Тааhаҕар нэhилиэгэр олохсуйбута. 3-с степеннээх Слава, 1 степеннээх Отечественная война орденнар кавалердара.
Алексей Афанасьевич хос сиэнэ Аргунов Байдам 2020 сыллаахха төрүччүтүн ырытан дакылаат суруйбутуттан быһа тардан хос эһэтин туһунан ааҕыҥ: "Хос эһэм Докторов Алексей Афанасьевич Үөһээ Бүлүү Ороһутуттан төрүттээх эбит. Хос эһэм Бүлүүгэ сылгыһытынан үлэлии сылдьан, Орто Бүлүүгэ кэлэ сылдьан, эбэбитин көрөн сөбүлээн, кэргэн ылбыт. Ол иһин Тааһаҕарга олохсуйбуттар, уон икки оҕону ииппиттэр. Хос эһээбит сэрии бэтэрээнэ.
Оҕолоругар киирдэххэ маннык:
Улахан кыыс Розалия Алексеевна алта оҕолоох.Кэргэнэ Коновалов Иван Иванович.Иккиэн колхозка үлэлээбиттэр. Иван Иванович омугунан нуучча.
Розалия улахан уола Докторов Василий Петрович Эбээн-Бытантайга олорор, үлэлиир.Икки кыыстаах.Ольга Юмшанова Дьокуускайга олорор,Министерствоҕа үлэлиир.Биир Виолетта диэн 11 кылааска үөрэнэр кыыстаах.Оттон иккис кыыһа Айсуолу Арюна диэн оҕолоох.Эмиэ куоракка олороллор.
Розалия улахан кыыһа Ирина Федорова аҕыс оҕолоох, аҕыс сиэннээх. Григорий хоту олорор, үлэлиир.Александра , Иван , Розалия, Василина, Ираида Бүлүү Хампа нэһилиэгэр олороллор.Надежда Тааттаҕа олорор, кэргэннээх. Аким устудьуон, опернай ырыаһыт буолаары сылдьар.
Розалия иккис уола Алексей Коновалов кэргэннээх, инбэлиит, фермер. Икки оҕолоох.Тааһаҕарга олорор.
Үһүс уол Анатолий Коновалов биир Василий диэн уоллаах. Тааһаҕарга олорор. Фермер.
Иккис кыыс Мария үс уолаттардаах. Билигин Үөһээ Бүлүүгэ бааллар.
Кыра кыыс Розалия түөрт оҕолоох,икки сиэннээх. Улахан кыыһа Мария Үөһээ Бүлүүгэ олорор, уһуйааҥҥа үлэлиир. Икки кыра оҕолордоох. Афанасий Бүлүүгэ олорор, кэргэннээх. Татьяна Бүлүүтээҕи колледж устудьуона, Айвар Тааһаҕар оскуолатын үөрэнээччитэ.
Эбээбит иккис улахан кыыһа Галина Алексеевна(игирэ аҥара) биэс оҕолоох. Идэтинэн бухгалтер. Лоомтукаҕа холкуоска бухгалтердаабыт. Кэргэнэ Антонов Иван суоппар эбит. Уон биир сиэннээх, биир хос сиэннээх. Иван куоракка олорор. Идэтэ-слесарь. Леонтий Алмазы –Анабара үлэлиир. Улахан уола Андрей устудьуон, кыра уола Леон уһуйааҥҥа сылдьар. Анна Гаврильева үс оҕолоох. Икки уола игирэлэр. Начальнай кылааска үөр. Кыыһа Наталья фотограф. Биир кыыстаах (Амелия), кэргэннээх. Куоракка олороллор. Александра Макитова үс оҕолоох. Кэргэнэ полиция Иван Макитов. Куоракка олороллор. Николай Антонов Бүтэйдээххэ олорор. Икки уоллаах –Алеша, Айтал.
Хос эбэм улахан уола Аркадий мас ууһа этэ, кэргэннээх. Кэргэнин кыыһа Екатерина учуутал, Мииринэйгэ олорор.
Хос эбэм кыыһа Евдокия Эверстова Кэбээйигэ Лүксүгүҥҥэ олорор. Аҕыс оҕолоох, уон икки сиэннээх. Ньургуйаана идэтинэн учуутал, үс оҕолоох, кэргэннээх. Саргылаана Посельская Чурапчыга олорор, баспытаатал идэлээх. Үс оҕолоох.Константин оскуолаҕа үөрэнэ сылдьан, быстахха былдьанан өлбүт. Владимир(Буока) Лүксүгүҥҥэ олорор.Марианна Охлопкова үс оҕолоох.Екатерина Пахомова икки кыыстаах, учуутал идэлээх. Надежда Макитова биир Сайаан диэн уоллаах. Алексей куоракка олорор, үлэлиир.
Хос эбэм кыыһа Нина (Ниинэккэ) Луковцева эмиэ Кэбээйи Лүксүгүнүгэр олорор.Улахан Уола Никиталыын (Никиискэ)олорор.Михаил эдэр сааһыгар суорума суолламмыт. Аммаҕа олоро сылдьыбыт. Михарима диэн кыыстаах үһү. Соҕотох Кыыһа Виктория Иванова алта оҕолоох.Чурапчыга олорор. Владимир (Бокколлой) икки уоллаах, Кэбээйигэ баар. Алексей суорума суолламмыт. Иван(Бааҥка) түөрт оҕолоох, билигин Кэбээйигэ баар. Аркадий(Аккай), Леонид Чурапчыга бааллар. Уол оҕолордоохтор.
Оттон биһиги эбэбит Татьяна Алексеевна кэлэр. Кини биһиги ийэбитин ииппит. Тааһаҕарга олорор, уһуйааҥҥа үлэлиир.
Мария (Мыттаа) Хампаҕа олорор, оскуолаҕа үлэлиир. Түөрт оҕолоох.Сэттэ сиэннээх. Марина Тыымпыга фельдшердыыр, элбэх оҕолоох ийэ. Иннокентий, Ирина ийэлэрин кытта олороллор. Ирина атыыһыттыыр. Алексей сварщик идэлээх.
Иван икки оҕолоох. Фермер, инбэлиит. Тааһаҕарга эбэбитин кытта олорор.
Александр Өлүөхүмэҕэ 1 Нөөрүктээйи олорор. Биэс оҕолоох, уон биир сиэннээх. Бары Өлүөхүмэҕэ олороллор, үлэлииллэр.
Надежда эдэр сааһыгар суорума суолламмыт.
Алексей фермер, Тааһаҕарга олорор.
Гарий Кыргыдайга олорор, кэргэннээх. Биир оҕолоох.
Галина Алексеевна этэринэн, биһиги поляк хааннаах үһүбүт. Ол иһин хос эбээбит Мария Архиповна күөх сырдык харахтаах, сырдык хааннаах эбит".
......................................................................................................................................................................
Докторов Алексей Афанасьевич Үөһээ Бүлүү Дүллүкүтүгэр балаҕан ыйын 1 күнүгэр 1914 сыллаахха күн сирин көрбүтэ.
1942 с. Аҕа дойду сэриитигэр ыҥырыллан барбыт. Кини красноармеец эбит. 124 стрелковай полкаҕа сылдьыбыт. Сэрииттэн 3с группалаах инбэлиит (атаҕынан) буолан, 1944с. эргиллэн тыыннаах кэлбит.
Орто Бүлүү Тааһаҕар нэһилиэгэр 1945с. сылгыһытынан үлэлии кэлбит. Онно хос эбэбитин Петрова Мария Архиповнаны көрсөн, ыал буолбуттар. Уон икки оҕоломмуттар.
Оҕолорун атахтарыгар туруораары араас үлэҕэ үлэлээбит. Кини уһанар эбит. Ордук дьиэ тутуутугар элбэхтик сылдьыбыт. Нэһилиэк кулуубун, балыыһатын тутуспут. Ону таһынан бултуура-алтыыра, балыктыыра. Аттыгар олорор дэриэбинэ дьонун күндүлүүрэ. ЛТО-ҕа элбэхтик наставнигынан үлэлээбит.
Кини суруйбат да, аахпат да эбит, ол да буоллар сүрдээх үлэһит, уус, оһуохайдьыт үһү. Оһуохай тылын ыһыахтарга ис иһиттэн ыллыыр эбит.
1990с. бэс ыйын 5 күнүгэр ыалдьан күн сириттэн күрэммит. Кини сэрии туһунан олох кэпсиирин сөбүлээбэт үһү. Сэрии туһунан санатар туох да суох буолуохтаах диэн, туох баар мэтээлин оҕолоругар оонньото биэрэр эбит. Ол иһин аҕыйах эрэ мэтээлэ хаалбыт.
Наҕараадалара «Память Народа» сайтан:
Эверстов В.К., Кэбээйи улууһун бочуоттаах гражданина, тыа хаһаайыстыбатын туйгуна, (Лүксүгүн, кулун тутар 15 күнэ 2019 сыл) ахтыыта:
... Докторов Степаннаах кыра бырааттара Афанасий диэнтэн мин кэргэним аҕата Докторов Алексей Афанасьевич Аҕа дойду сэриитин ветерана, Слава уордьан III степенин, элбэх медаллар кавалердара төрөөбүт буолуохтаах. Ол киһи сэрии кэнниттэн Үөһээ-Бүлүүттэн, Орто-Бүлүүгэ Тааһаҕар диэн сиргэ кэлэн, Мария Архиповна Петрованы кэргэн ылар. Онтон мин кэргэним Евдокия Алексеевна төрөөбүт. Онтон биһиги ыал буолабыт. Кэргэним аҕата Докторов Алексей Афанасьевич биһиэхэ Лүксүгүҥҥэ оҕотун билсэ кэлэ сылдьан, хоно сытан Лүксүгүн күөл кырдьаҕастар тумуһахтарын отун-маһын, күөл хас тумуһахтааҕын, булуҥнааҕын барытын, Долгуннаах эбэни, хайа тумуһахха Үөһээ-Бүлүүлэр олоро сылдьыбыттарын барытын ыллаан хоһуйбутун истэ сытан, мин аҕам бэркэ диэн биһирээбит, сөру диэн сөхпүт этэ...
Комментариев нет:
Отправить комментарий